歌影視配音播音 譚炳文瓣瓣掂

炳哥譚炳文不敵癌魔與世長辭，唔少香港人都覺得好可惜，因為呢位藝人太深入民心。諗返轉頭，炳哥自五十年代出道以嚟，播音、配音、出唱片、電視、電影乜都有佢份，而且好多經典。

炳哥係五十年代加入麗的，憑住佢把靚聲成為廣播同配音嘅名人，响六十年代宣傳香港旅遊業嘅短片，佢已經做旁白。到咗六十年代尾，佢就開始活躍於電視界，其中佢就幫大台拍劇同配音，阿史對佢演嘅電視角色印象最深就係《京華春夢》演嘅大少，件衫金閃閃成為去飲大煙玩女人，演到入形入格。而七八十後可能對炳哥最熟悉，就係配過唔少經典卡通角色，唔駛多講都知佢配嘅宇宙大王尼古真大王。除咗卡通角色，大台好多外購片經典角色又係由佢操刀，《教父》中嘅古良年（即VITO）、《包青天》嘅包拯，都係佢把聲嚟。至於唱歌，炳哥生前推出過逾30張黑膠唱片，《舊歡如夢》﹑《禪院鐘聲》﹑同老拍檔李香琴合唱嘅《你回來吧》。

係咁意數下已經數咗咁多經典，炳哥江湖地位真係難以代替。